ရိုဟင်ဂျာဒုက္ခသည်များ နေရပ်ပြန်ပို့ရေးနှင့် မလေးရှား၏ စံလွဲ သံတမန်ရေးရာ ခြေလှမ်း
ရွေးကောက်ပွဲနီးချိန် မလေးရှားက စစ်ကောင်စီနှင့် ရိုဟင်ဂျာ ၂ သိန်းခန့် ပြန်ပို့ရေး တိုက်ရိုက်ဆွေးနွေးမှုသည် လူသားချင်းစာနာမှုရပ်တည်ချက်မှ သွေဖည်သွားခြင်းဖြစ်သည်။ မင်းအောင်လှိုင်နှင့် ထိတွေ့ဆက်ဆံခြင်းက စစ်အုပ်စုကို တရားဝင်မှုပေးရာရောက်ပြီး အာဆီယံဘုံသဘောတူညီချက်ကို ပျက်ပြားစေသည်။ အန္တရာယ်ရှိသည့် စစ်နယ်မြေတွင်းသို့ နေရပ်ပြန်ပို့ခြင်းသည် အပြည်ပြည်ဆိုင်ရာ ဒုက္ခသည်ပြန်မပို့ရေးဥပဒေ (non-refoulement) ကို ပြောင်ပြောင်တင်းတင်း ချိုးဖောက်ကာ မလေးရှား၏ နိုင်ငံတကာဂုဏ်သိက္ခာကိုလည်း ထိခိုက်စေပါသည်။
ဒစ်ဂျစ်တယ် ဖိနှိပ်မှု - စစ်အုပ်ချုပ်ရေးမှသည် "ဥပဒေဖြင့် တိုက်ခိုက်ခြင်း" ဆီသို့
မိတ်ဆက် ။ ။ မြန်မာနိုင်ငံ၏ အာဏာကူးပြောင်းမှုသည် ကြောက်မက်ဖွယ်ကောင်းသော အခန်းကဏ္ဍသစ်တခုသို့ ရောက်ရှိလာပြီ ဖြစ်သည်။ ၂၀၂၁ ခုနှစ်တွင် မြေပြင်ပေါ်ရှိ စစ်ဖိနပ်သံများ၊ တနိုင်ငံလုံးအနှံ့ အင်တာနက်ဖြတ်တောက်မှုများဖြင့် စတင်ခဲ့သည့် ဗြောင်ကျကျ ဖိနှိပ်မှုပုံစံသည် ၂၀၂၆ ခုနှစ်သို့ ရောက်ရှိလာသောအခါ ခေတ်မီပြီး အလိုအလျောက် စနစ်တကျ လုပ်ဆောင်သည့် "ဒစ်ဂျစ်တယ် အာဏာရှင်စနစ်" (Digital Dictatorship) အဖြစ်သို့ ပြောင်းလဲလာခဲ့သည်။ စစ်ကောင်စီသည် ယာယီအရေးပေါ် အမိန့်ဒီကရီများမှတဆင့် "ဥပဒေဖြင့် တိုက်ခိုက်ခြင်း" (Lawfare) ဟုခေါ်သော အမြဲတမ်းစနစ်သို့ ကူးပြောင်းနေပြီဖြစ်သည်။ ၎င်းသည် ၂၀၂၅ ခုနှစ် ဆိုင်ဘာလုံခြုံရေး ဥပဒေကို စနစ်တကျ အသုံးချပြီး ဒစ်ဂျစ်တယ်နယ်ပယ်အတွင်းရှိ ပြည်သူများ၏ နေ့စဉ်ဘဝကို ရာဇဝတ်မှုအဖြစ် သတ်မှတ် အရေးယူခြင်း ဖြစ်သည်။